Kva skjedde før nyttår? Klikk Aktuelt i 2024. ------>
Frå påskekonserten for to år sidan.
PÅSKEKONSERT I SKOGEN PÅ SKJÆRTORSDAG
Den tradisjonelle påskekonserten i regi av GULLHAUGKONSERTANE går på skjærtorsdag klokk 1500 ved NATURSCENEN.
13.03.2026
FATLANDSKOGEN ER TIL SALS
Er du den rette til å overta og driva denne store eigeommen vår? Me er litt for gamle til dette ansvaret i dag, så me ønskjer avløysing. Klikk her for å sjå salsannonse.
25.12.2025
Huldrene i aksjon. Foto Fabian Ruud.
HULDRENE I STORFORM
Under førjulskonserten søndag 30.11.2025 var det spesielt Huldrene sin enorme framgang frå i fjor publikum merka seg. Dessutan hadde leiar Torvald ei overrasking på lur.
Les meir under Gullhaugkonsertane her.
30.11.2025
STORFINT BESØK FRÅ ROSENDAL
For eit par dagar sidan hadde me besøk av ei gruppe mannfolk frå Rosendal. Kåre Eik er jo kjend som ein dugande fotograt, så bildeserien her er naturlegvis hans verk. Han fekk derfor ikkje vera med på bildet sjølv, men Arne var raus og stilte opp i staden.
Dei kallar seg "Yngre Pensjonisters Tur- og Spazerklubb", og Kåre har sendt medlemmane eit lite referat frå turen. Her er referatet hans, berre pitte litt tilpassa av Arne, som aldri lar sjansen gå frå seg til å retta litt i gramatikk og ortografi:
Også denne gongen møtte det 12 yngre eldre som fordelte seg i fire bilar. Arne Gjerde tok oss vel i mot på P-plassen. Han informerte om staden vi var komne til og vurderte sin og vår aldrande livssituasjon i morosame vendingar. Sjølv hadde han enno mange aktivitetar på gang, han var t.d. i ferd med å skriva bok med tittel "Den kommunale krokfoten".
Alt går mykje tregare no enn før, sa han, og då kan nemnast at han tidlegare var superhurtig på alt som galdt programmering og denslags. Den lesverdige boka hans "Det lange huset" handlar om hans livreise, med etter kvart utvikling av dataprogram (Adonis), som blir brukte både nasjonalt og internasjonalt. Ref. det Per Ove Kviteberg fortale oss tidlegare om kontor i Ukraina, og at heile sulamitten no er selt, med hovudkontor i Washington DC.
På bileta her ser vi: Arne som turistvert av beste sort, bygningsrådet samla på Gullhaug, ein bassist og ein kornettist som drøymer om å bli inviterte til Gullhaugkonsertane, og ei felles jenta som Arne og Kjell har liggjande i Arne sin verkstad. Kjell Musland har skore ut mange figurar for Arne. Arne sitt sagbruk i nabobygget imponerte dei som forstår seg på slikt.
Før matøkt ved langbordet, mottok Arne takk frå Torstein. Sikkert også takk for at Torstein i uminnelege tider har vore hoffleverandør av blomar til Arne... Vi vippsa kr 100 kvar, til Arne sitt system, og personleg fekk han "Høgt og lågt i Kvinnherad". Den boka hadde han sjølvsagt, men ville bruka den han fekk no til presang utanlands, sidan det er mulig å lesa teksten på utanlandsk.
Det var nydeleg ver med pittelitt gåing på gode stiar. Tilbod om lengre gåing, t.d. til Sydnessåto, var det ingen som beit på i dag.
16.10.2025
HAUSTEN ER EI FIN TID I SKOGEN
Vèret varierer jo, men alle sorter vêr har sin sjarm, så også haustvèret. Og sjarmen med hausten er først og fremst at vêret varierer.
Skulle det bli regn på deg, så kan du krypa inn under dette gapahuset, som me kallar det, nede ved hovudvegen. Her er det bålpanne og sitjeplassar under tak. Snart kjem det også skikkelege bord og benker. Og utanfor er det diverse leikeområde. Pluss putteball-bane, eller kva det nå heiter.
Det er Kjell Rune Asmervik du ser på bildet, her legg han siste hand på sjølve bygningen. Han gjer framleis ein fenomenal dugnasjobb for Fatland Vel. Generalgeneralen kallar me han gjerne, fordi han står så langt langt over alle andre når det gjeld dugnadsarbeid.
Generalgeneralen har forresten utlyst namnekonkurranse for gapahuset. Har du eit forslag? Det beste forslaget så langt må vel vera Strondabu, eit knakande godt namn etter vår meining.
05.10.2025
FATLANDSKOGEN SKAL NÅ SELJAST!
Ikkje alle vil tru det, for me har snakka om det i nokre år. At me vil gi frå oss denne store flotte skogeigedommen vår til nokon andre, som skal driva vidare.
Men nå er det endeleg. I dag har me gått ut med annonse på Finn, og me skal følgja opp med nokre fleire annonsar her og der.
Om ikkje nett du er interessert, så fortel det gjerne til andre. Det hadde vore kjekt om FATLANDSKOGEN framleis blir på lokale hender. Men avgjerande er det ikkje, det er viktigare at kjøparane har rette ånda. For det vil unekteleg følgja eit seriøst forvaltaransvar med å eiga ein slik flott plass
Du kan lesa mykje meir i salgsprospektet vårt.
09.06.2025
PS. I går snakka me med ein svært oppegåande kvinnhering oppe i skogen. Han sa at FATLANDSKOGEN har blitt turmål nummer éin i Kvinnherad.
Bildet: Desse to blide damene (mor og dotter) frå fastlandet trefte me òg på i går, i NATURSTIEN. Dei skulle lufta hunden sin, og då var sjølvsagt FATLANDSKOGEN det naturlege valet.
Frå friluftsgudstenesta på GULLHAUG for to år sidan. Viss det regnar, flyttar me oss under tak.
Fantastisk kjekt bilde av ei bursdagsfeiring i FATLANDSKOGEN på langfredag. Her har ein samla familie frå fleire vestlandskommunar, til ein trettenårsdag ved gapahuken ved Fatlandsvatnet. Foto: Berit Kristine Rolland.
KORT PÅSKEREFERAT
Me grunneigarane var sjuke gjennom heile påskeveka, og vel så det. Så me fekk dessverre ikkje oppleva alt folket og stemninga som var i skogen denne gongen. Men referata frå andre var veldig oppmuntrande, og inspirerande med tanke på å bli friske nok til ny innsats.
Det frivillige laget GULLHAUGKONSERTANE tok over ansvaret for kiosken og anna, og slik blir det sikkert for ettertida. Me gamle treng færre oppgåver, og sidan dei kommunale revestrekane livna til att på våren, saman med hoggormen, så er vel tida inne til å vurdera fleire nye tankar for oss.
På skjærtorsdag hadde laget påskekonserten sin. Det var ein suksess, med rundt 200 personar samla ved NATURSCENEN. Eit enkelt referat frå konserten kan du lesa her. Det var visst veldig kjekt.
Me har nå bestemt oss for at sponsorpengar, som du og andre måtte vippsa (Vipps 72 44 33) til arbeidet med NATURSTIEN, også vil kunna brukast til vårplantinga på GULLHAUG. Iallfall denne gongen. Dette fordi kommunen framleis ikkje lar oss få tena pengar på denne delen av eigedommen vår, samtidig som me framleis lar folk få lov å bruka GULLHAUG relativt fritt. Den vesle pensjonen vår rekk ikkje til mange blomane åleine.
Dessutan er den viktige delen av NATURSTIEN faktisk ferdig nå, så det trengst ikkje så mykje pengar der framover. Men at folk ville reagera negativt dersom me lar GULLHAUG få gro att, er me nokså sikre på. Derfor trengst det litt pengar der den neste månaden for å få hagen opp og stå. Så vurderer me vidare utover sommaren korleis me kan komma i mål med litt meir utover dette. Det avheng av kor lang og krokete den kommunale krokfoten blir i år.
Tusen takk til alle som bidrar! Både med pengar og med positive tilbakemeldingar! Det ligg an til å bli ein kjekk sommar denne gongen òg, trass i dei mørke kommunale skyene.
30.04.2025, oppdatert 11.05.2025
FØRSTE STRONDALØPET VAR DEFINITIVT EIN SUKSESS
I går fann første Strondaløpet i historia stad, på det nye Red Barn Stadium i Fatlandskogen. Det er vårt uhøgtidelege namn på området rundt Raualøo. På engelsk sjølvsagt, i tilfelle det etter kvart skulle bli litt meir internasjonal swung over arrangementet. Namnet har ingen ting med Redd Barna å gjera, om du skulle tru det.
Området rundt løo har blitt oppgradert ein del i det siste, og det fungerte hundre prosent som planlagt. Det vil ikkje vera problem å takla 3-4 gonger så mange menneske her. Einaste ulempa er at me må sleppa bilane gjennom arenaen av og til, for området nede ved sagbruket må brukast til parkering.
Men altså Strondaløpet. Eit arrangement som Fatland Vel arrangerer, i samarbeid med Halsnøy o-lag. Fatlanskogen er for så vidt også med på lasset, ved å halda arenaen og andre nødvendige ressursar.
Generalgeneral Kjell Rune Asmervik hadde eit 20-tals gulkledde ivrige funksjonærar med på laget. I tillegg var Røde Kors på plass, strategisk plassert berre nokre meter frå målgang. Staben gjorde ein framifrå jobb, og sanitetsfolka hadde heldigvis lite å gjera.
Det var 128 personar som fekk utdelt startnummer, ein fin framgang frå prøveløpet i oktober, som samla vel 70. Neste år bør det kunna bli endå ein liten auke. Ja, for mange uttrykte seg i nesten svulmande ord om det fine arrangementet, som dei slo fast måtte bli årvisst etter dette.
Etter premieutdelinga fekk Kjell Rune Asmervik og Marte Simonsen Reigstad utdelt Gullhaugmedaljen av Arne. Kjell Rune for sin mangeårige fenomenale innsats med å laga gode stiar i skogen. Og Marte fordi ho er den utan samanlikning ivrigaste brukaren av Fatlandskogen.
Eit fleirfaldig hurra for dei!
Du kan lesa meir, og sjå massevis av bilde, i Grenda og Kvinnheringen sine flotte reportasjar. Viss du har abonnement, vel å merka.
07.04.2025
Klar arena på morgonkvisten, med passasje for bilane gjennom området.
God plass til publikum, for å setja seg ned både her og der.
Fleire barnefamiliar var tidleg ute, her i innspurten mot mål.
Løpskontor, med Torvald på trekkspel den første timen.
Røde Kors installerer seg.
Fleire påmeldingar kom etter kvart.
Folk er ikkje kakesvoltne radt enno, så seljarane slappar av.
Familiane rusla jamnt og trutt gjennom dagen.
Påmeldingsområdet er ein fin pratearena.
Også ruslarane utan tidtaking vart heia ivrig over målstreken.
Pang! Der gjekk startskotet for den lengste løypa, med tidtaking.
Og pang igjen! Der går vinnaren av langløypa over mål, på fantastisk tid!
Somme kom og gjekk gjennom dagen, men mange var der heile tida.
Kjell Rune gir premie til Bjørg Emmerhoff, som vann dameklassen.
Og til Johannes Teigen, vinnaren av herreklassen.
Seierspallen, med dei tre beste i herreklassen.
Til slutt dei stolte mottakarane av Gullhaugmedaljen, Kjell Rune og Marte.
PÅSKEPROGRAMMET I ÅR
Også i år blir det påske i FATLANDSKOGEN. Viss verda står til påske, vel og merka. Og det plar ho vanlegvis gjera.
Klikk på programmet ved sida av, og les deg opp. Og veldig velkommen skal du vera, saman med familie og venner!
05.04.2025
KOM PÅ STRONDALØPET!
Fatland Vel , i samarbeid med Halsnøy o-lag, arrangerer det første offisielle STRONDALØPET søndag den 6. april. Der må du komma, enten du er publikummar eller løpar.
Les meir på plakatar rundt om, og på Fatland Vel si Facebook-side. Eller berre klikk på plakaten ved sida av her.
Om du ikkje vil delta i løpet, så er det massevis av godsaker å få kjøpt i kiosken!
19.03.2025
Her startar hogstfeltet. Du har ingen problem med å sjå det, for desse plakatane gir deg informasjonen du treng. Berre gå roleg vidare innover vegen.
Her er Ragnvald Vaage i fint driv med hogstmaskinen sin. Det er flott sitkatømmer han legg ned i første omgang, seinare blir det gran og furu.
TØMMERHOGST PÅGÅR VED HJORTESTIEN!!!
Gjennom heile mars, og ei veke eller to ut i april, vil det gå føre seg tømmerhogst på sørsida av bilvegen som går innover mot Høgåsen, i området frå ca 100 meter innom STEMHILDEREN, og inn til Åsabakken.
I denne perioden er det forbode å gå ut i terrenget på sørsida av vegen der hogstfeltet er. Du kan framleis gå på bilvegen innover, så HJORTESTIEN er absolutt ikkje stengd. Men ta omsyn når du ser skogsmaskinane, og følg instruksar på plakatar og frå hogstfolket.
Sikker avstand frå hogstmaskinen er 90 meter. Viss du går på bilvegen, og maskinen er nærmare enn 90 meter, må du passa på at maskinkøyraren ser deg og er obs på at du passerer.
Utover året, etter at hogsten er ferdig, er det sjølvsagt meininga å rydda opp i feltet. Ein del av feltet skal bli eit såkalla frøstillingsbestand, noko som betyr at det skal stå att nokre tre som feller frø. Ny skog skal så komma opp frå desse frøa.
Resten av feltet blir nok planta til, men mest truleg ikkje med gran denne gongen. Me har lyst til å prøva med lauvtre, kanskje helst hengebjørk, noko som vil gjera det til eit fantastisk flott felt å sjå på, og å gå i. Men detaljane om korleis dette feltet faktisk skal bli, ventar me med å planleggja til etter at hogsten er ferdig. Først når skogen er borte får me eit skikkeleg visuelt inntrykk av feltet.
På grunn av klimaendringane vil kanskje ikkje grana klara seg like godt her hos oss i framtida, derfor er det lurt å satsa på nokre andre treslag òg, som me veit tåler det nye klimaet betre.
06.03.2025, oppdatert 10.03.2025 og 02.04.2025
05.04.2025: HOGSTEN ER NÅ AVSLUTTA, SÅ DET ER FRI FERDSEL ATT.
KJEM PUTIN TIL GULLHAUG TIL SOMMAREN?
Ja, dette har me lese, men du skal aldri tru på alt du les. Om du lurer på om det kan vera noko i dette ryktet, må du lesa her.
03.03.2025
KUNSTVERKET ER PÅ PLASS
Ja, det må med rette kunna kallast eit kunstverk, denne flotte teikninga som Anna og Arne fekk frå lokalavisa Grenda, som eit varig minne om at dei vart kåra til Årets namn 2024, for arbeidet med FATLANDSKOGEN.
Og på plass er kunstverket komme, på veggen heime i huset.
Teikninga er laga av illustratør og karikaturteiknar Eivind Bøvor, og det er lett å forstå korfor Grenda nyttar han til denne jobben kvart einaste år. Ser du på bildet, er det utruleg kor mange typiske detaljar han har fått med.
Du kan lesa artikkelen om overleveringa på Grenda si nettside.
Me takkar av heile vårt hjarta! Takka går sjølvsagt til både Grenda og kunstnaren, men ikkje minst til alle kjekke kvinnheringar som har stemt på oss! Og kjekke kvinnheringar, dei er det mange av!
02.03.2025
VIL DU KJØPA EIN BIT AV GULLHAUG?
Nei, GULLHAUG er nok framleis ikkje til sals. Men sidan me treng eigenkapital til å gjera anlegget på GULLHAUG ferdig i år, så vil me selja den draumetomta som ligg rett på framsida av toppen. Altså, nede ved foten på vestsida, der den raude pila viser, med fantastisk utsikt utover fjorden.
27.01.2025
19.03.2025: NB! Draumetomta di er nå seld!
ÅRETS NAMN I KVINNHERAD!
Det var kjekt å opna Grenda i dag, for framsida viste at Anna og Arne har blitt kåra til Årets namn i Kvinnherad for året 2024. Dette for arbeidet med FATLANDSKOGEN og GULLHAUG.
Hurra!
Først og fremst viser denne utmerkinga at folket i kommunen står fjellstøtt på vår side i arbeidet, trass i at kommunale byråkratar har hindra oss i å få til det viktigaste. Vårt håp er at også byråkratane ser at dette er noko folket vil ha, og at dei derfor bør vera meir hjelpsame i det vidare arbeidet.
Me rettar ei stor takk til alle som har stemt på oss! Og for alt skrytet som i etterkant har komme, både gjennom telefon, SMS, epostar og på sosiale media.
Det varmar! Me ser at me har ikkje jobba forgjeves når folk er så positive. Og me ser at me må halda fram arbeidet, så langt kreftene og lommeboka held stand.
Ikkje minst må me også retta takka vår til dei som har foreslått oss som kandidatar. Utan å vera kandidat så kan du jo ikkje vinna, ikkje sant? Så forslagsstillarane er kanskje dei aller viktigaste når alt kjem til alt. Eit kjempestort hurra for dei òg!
Og hurra for Grenda! Du kan lesa meir om alt dette på Grenda si nettside, men berre viss du har eit abonnement som gir tilgang. Det er ein fenomenal artikkel Eli Hårklau har laga om oss, det seier alle!
31.12.2024